मनसादेवी स्रोत्र
 |
| मनसादेवी स्तोत्र |
श्री नारायण उवाच
श्रूयतां मनसाख्यानं यत् श्रुतं धर्मवक्त्रतः || १ ||
सा च कन्या भगवती कश्यपस्य च मानसी |
तेनैव मनसा देवी मनसा या च दीव्यति || २ ||
मनसा ध्यायते या च परमात्मानं ईश्वरम् |
तेन सा मनसादेवी तेन योगेन दीव्यति || ३ ||
आत्मारामा च सा देवी वैष्णवी सिद्धयोगिनी |
त्रियुगं च तपस्तप्त्वा कृष्णस्य परमात्मनः || ४ ||
जरत्कारुशरीर च दृष्ट्वा यत् क्षिणमीश्वरः |
गोपीपतिर्नाम चक्रे जरत्कारुरिति प्रभुः || ५ ||
वांछितं च ददौ तस्यै कृपया च कृपानिधिः |
पूजां च कारयामास चकार च स्वयं प्रभुः || ६ ||
स्वर्गे च नागलोके च पृथिव्यां ब्रह्मलोकतः |
भृशं जगत्सु गौरी सा सुन्दरी च मनोहरा || ७ ||
जगद्गौरीति विख्याता तेन सा पूजिता सती |
शिवशिष्या च सा देवी तेन शैवी प्रकीर्तिता || ८ ||
विष्णुभक्ता अतीव शश्वद् वैष्णवी तेन कीर्तिता |
नागानां प्राणरक्षित्री यज्ञे पारीक्षितस्य च || ९ ||
नागेश्वरीति विख्याता सा नागभगिनीति च |
विषं संहर्तुं ईशा या तेन विषहरी स्मृता || १० ||
सिद्धियोगं हरात् प्राप तेन सा सिद्धयोगिनी |
महाज्ञानं च योगं च मृतसंजीवनीं पराम् || ११ ||
महाज्ञानयुतां तां च प्रवदंति मनीषिणः |
आस्तीकस्य मुनीन्द्रस्य माता सापि तपस्विनी || १२ ||
आस्तीकमाता विज्ञाता जगत्यां सुप्रतिष्ठिता |
प्रिया मुनेः जरत्कारोः मुनीन्द्रस्य महात्मनः || १३ ||
योगिनी विश्वपूज्यस्य जरत्कारुप्रिया ततः |
जगत्कारुः जगद्गौरी मनसा सिद्धयोगिनी || १४ ||
वैष्णवी नागभगिनी शैव नागेश्वरी तथा |
जरत्कारुप्रिया - आस्तीकमाता विषहरेति च || १५ ||
महाज्ञानयुता चैव सा देवी विश्वपूजिता |
द्वादशैतानि नामानि पूजाकाले तु यः पठेत् || १६ ||
तस्य नागभयं नास्ति तस्य वंशोद्भवस्य च |
नागभीते च शयने नागग्रस्ते च मंदिरे || १७ ||
नागशोभे महादुर्गे नागवेष्टितविग्रहे |
इदं स्तोत्रं पठित्वा तु मुच्यते नात्र संशयः || १८ ||
नित्यं पठेत् यः तं दृष्ट्वा नागवर्गः पलायते |
दशलक्षजपेनैव स्तोत्रसिद्धिः भवेत् नृणाम् || १९ ||
स्तोत्रसिद्धिः भवेत् यस्य स विषं भोक्तुमीश्वरः |
नागैश्च भूषणं स भवेत् नागवाहनः || २० ||
नागासनो नागतल्पो महासिद्धो भवेत् नरः |
अंते च विष्णुना सार्धं क्रीडत्येव दिवानिशम् || २१ ||
|| मनसा देवी स्तोत्र सम्पूर्णं ||