शिव स्तुतिः
 |
| शिव स्तुतिः |
स्कन्द उवाच
नमः शिवायास्तु निरामयाय नमः शिवायास्तु मनोमयाय |
नमः शिवायास्तु सुरार्चिताय तुभ्यं सदा भक्तकृपापराय || १ ||
नमो भवायास्तु भवोद्भवाय नमोऽस्तु ते घ्वस्तमनोभवाय |
नमोऽस्तु ते गूढमहाव्रताय नमोऽस्तु मायागहनाश्रयाय || २ ||
नमोऽस्तु शर्वाय नमः शिवाय नमोऽस्तु सिद्धाय पुरातनाय |
नमोऽस्तु कालाय नमः कलाय नमोऽस्तु ते कालकलातिगाय || ३ ||
नमो निसर्गात्मक भूतिकाय नमोऽस्त्वमेयोक्षमहर्द्धिकाय |
नमः शरण्याय नमोऽगुणाय नमोऽस्तु ते भीमगुणानुगाय || ४ ||
नमोऽस्तु नानाभुवाधिकर्त्रे नमोऽस्तु भक्ताभिमतप्रदात्रे |
नमोऽस्तु कर्मप्रसवाय धात्रे नमः सदा ते भगवन् सुकर्त्रे || ५ ||
अनन्तरूपाय सदैव तुभ्यमसह्यकोपाय सदैव तुभ्यंम् |
अमेयमानाय नमोऽस्तु तुभ्यं वृषेन्द्रयानाय नमोऽस्तु तुभ्यम् || ६ ||
नमः प्रसिद्धाय महौषधाय नमोऽस्तु ते व्याधिगणापहाय |
चराचरायाथ विचारदाय कुमारनाथाय नमः शिवाय || ७ ||
ममेश भूतेश महेश्वरोऽसि कामेश वागीश बलेश धीश |
क्रोधेश मोहेश परापरेश नमोऽस्तु मोक्षेश गुहाशयेश || ८ ||
शिव उवाच
ये च सायं तथा प्रातस्त्वत्कृतेन स्तवेन माम् |
स्तोष्यन्ति परया भक्त्या शृणु तेषां च यत्फलम् || ९ ||
न व्याधिर्न च दारिद्र्यं न चैवेष्टवियोजनम् |
भुक्त्वा भोगान् दुर्लभांश्च मम यास्यन्ति सद्म ते || १० ||
|| इति श्री स्कन्दमहापुराणे कुमारिकाखण्डे शिवस्तुतिः सम्पूर्णा ||
Tags:
Stotra