श्री राधाष्टकम् | Shree Radhashtakam |

 

श्री राधाष्टकम्

श्री राधाष्टकम्

नमस्ते श्रियै श्री राधिकायै परायै

नमस्ते नमस्ते मुकुन्दप्रियायै |

सदानन्दरुपे प्रसीद त्वमन्तः

प्रकाशे स्फुरन्ती मुकुन्देन सार्धम् || १ ||

स्ववासोऽपहारं यशोदासुतं वा

स्वदध्यादिचौरं समाराधयन्तीम् |

स्वदाम्नोदरं या बबन्धाशु नीव्या

प्रपद्ये नु दामोदरप्रेयसीं ताम् || २ ||

दुराराध्यमाराध्य कृष्णं वशे त्वं

महाप्रेमपूरेण राधाभिधाऽभूः |

स्वयं नामकृत्या हरिप्रेम यच्छ

प्रपन्नाय में कृष्णरुपे समक्षम् || ३ ||

मुकुन्दस्त्वया प्रेमदोरेण बद्धः

पतङ्गो यथा त्वामनुभ्राम्यमाणः |

उपक्रीडयन् हार्दमेवानुगच्छन्

कृपा वर्तते कारयातो मयेष्टिम् || ४ ||

व्रजन्तीं स्ववृन्दावने नित्यकालं

मुकुन्देन साकं विधायाङ्गमालम् |

सदा मोक्ष्यमाणानुकम्पाटकाक्षैः

श्रियं चिन्तयेत् सच्चिदानन्दरुपाम् || ५ ||

मुकुन्दानुरागेण रोमाञ्चिताङ्गी

महं व्याप्यमानां तनुस्वेदविन्दुम् |

महाहार्दवृष्ट्या कृपापाङ्गदृष्ट्या

समालोकयन्तीं कदा त्वां विचक्षे || ६ ||

पदाङ्कावलोके महालालसौघं

मुकुन्दः करोति स्वयं ध्येयपादः

पदं राधिके ते सदा दर्शयान्त

हृदीतो नमन्तं किरद्रोचिषं माम् || ७ ||     

सदा राधिकानाम जिह्वाग्रतः स्यात्

सदा राधिका रुपमक्ष्यग्र आस्ताम् |

श्रुतौ राधिकाकीर्तिरन्तःस्वभावे

गुणा राधिकायाः श्रिया एतदिहे || ८ ||

इदं त्वष्टकं राधिकायाः प्रियायाः

पठेयुः सदैवं हि दामोदरस्य |

सुतिष्ठन्ति वृन्दावने कृष्णधाम्नि

सखीमूर्तयो युग्मसेवानुकूलाः || ९ ||

|| इति श्री भगवन्निम्बार्कमहामुनीन्द्रविरचितं श्री राधाष्टकं सम्पूर्णम् ||